Lina Spies - Uit Dagreis

Lina Spies | Stokperdjies | Werke | Outeurs

UIT DIE BUNDEL DAGREIS, 1976

D.J. OPPERMAN

15 Februarie 1976

Wild men who caught and sang the sun in flight,

And learn, too late, they grieved it on its way,

Do not go gentle into that good night.

(Dylan Thomas)

Die kort reis na Carrara afgelê,

al die gramadoela-togte deur die land,

is dit die tyd vir God

om in ‘n moerbeiboom se ligkolom

jou te ontmoet?

Maar oral word dit donker

as daardie oermoeras jou in hom terug wil suig,

en jou verloste engel moet weer staan

in die koue kaggel van my hart,

glansend en toornig in die klopboog

om al my woorde wat tot as vergaan.

Jy mag nie nou tot riet en water word,

moet vegtend verder tas

tot jy die stormwind weer voel

wat oor die brakland jaag van Afrika,

want een soos jy wat die groot son

uitgesing het bo die Vallei van Duisend Heuwels

gaan daardie laaste nag nie stil-gedwee in.

Terwyl die ander slaap,

is saam met my die piesangboom, die klip,

die kiepersol en wolk aan’t bid

vir jou, Sy dertiende dissipel,

wat weet van Hom in ieder ding en mens,

en in ‘n eensame verbond met angs en wee

die stryd om Sy heelal in vers na vers besleg.

Deur Sy genade en Sy meegevoel

begin in my jou rooi poinsettia brand.

LIED VAN DIE KINDERS

“Laat die kindertjies na My toe kom”

Die Joodse seuntjie

Wat sy armpies in die lug steek

Voor die SS,

Sy oë wyd gerek,

Op sy mou die groot, geel Dawidster.

“Laat die kindertjies na My toe kom”

die Viëtnamese dogtertjie

oumens-krom aan haar stok geklem

op die slagveld heen en weer

terwyl oor haar bors

‘n kruisie hang.

“Laat die kindertjies na My toe kom”

die klein vergete Ier

op ‘n sypaadjie in Belfast

tussen die bloed en bomme

wat opnuut sy land vrymaak.

Laat die kindertjies van Isreal na My kom,

Gevang in die kruisvuur by Ma’a lot –

Bang hasies in ‘n bos wat brand.

Laat hulle kom, die gevreesde koningskinders van jy volk

Wat die Romeine doodgesteek het

Toe in ‘n stal se stank van mis en bloed,

Ek self die Kind van Bethlehem was.

Verhinder hulle nie

  Herodes

     Dissipels

  Soldate

           Grootmense

FAMILIE

Soms oor die telefoon

Kan ek my nog verbeel dis sy

As jou gestaltelose stem

Vra hoe dit gaan.

Ek sien jou nie verdubbel

Tot die vreemdeling

Met wie ek onbekendheid

As verwantskap deel.

Vroeër het ons gepraat

Oor die lewe en oor God.

Nou: die skaarsheid van rooiwyn,

Die beste opwasmiddel vir die skottelgoed.